لابارك الله في صديق تزعله كلمة عتاب = ولاجمع الله الرجال اللي تفرقهم مره
الصاحب اللي مايجي من صحبته غير العذاب = نذرا علي إن ماهجرني ولا أنا اللي بهجره
من يفتح لفرقاي باب أفك له عشرين باب = وإذا صديقي مايقدر خوتي ما أقٌدره
أنا تجرعت الظما لين إحترق وجهي وذاب = أنا كسرت بخاطري قبل الصداقة تكسره
أنا خسرت اللي غيابه غير عن كل الغياب = أنا غفرت لعالم ماتستحق المغفرة
أنا أكثر إنسان تعلم من كثر ما أخطا وصاب = أنا آخر لسان يتكلم في زمان الثرثرة
أنا القصيد اللي طلع من دفتره مليون ناب = وأنا الوحيد اللي جمع مليون ناب بدفتره
جفني وجرحه السهر وحيلي هدته الصعاب = دمعي هدر ضحكي ندر عمري وضيعت أكثره
شيٌبت بعقول العرب هيبت روسٍ ماتهاب = جمهرت ناسٍ عمرهم مايعرفون الجمهرة
ماصرت ذيب إلا لأن اللي تحدوني ذياب = ماكنت أغيب إلا لأن العفو عند المقدرة
ترا حلاتك اذا حملت لصاحبك كلمة عتاب = إن مانطقت بها بوجهه ماتذمه وتقدره
بهالزمن مايملي عيون الحسود إلا التراب = ولا الحظيظ الطلقة اللي ما تصيبه تذعره
ودك اليامن جاتك الغلطة من الناس القراب = الصاحب اللي ماكسبت محبته ماتخسره
موضوع: لابارك الله في صديق تزعله كلمة عتاب ولاجمع الله الرجال اللي تفرقهم مره 
