نكات سودانية

 السلام عليكم ورحمة الله وبركاته

نبدأ بدون مقدمات

 بعرف انو اللهجة السودانية صعبة بس اليفهم هذي عندو جائزة خخخخخ

واحد رباطابي راكب القطر قاعد جنب الشباك فطلب منه الزول القاعد جنبو ممكن اقعد جنب الشباك عشان انا بسف الصاـعود وبتف فقال له وانا بسف وببلع

عمنا الفنان الكبير احمد عمر الرباطابي له الرحمة له العديد من الطرائف مرة بياكل مع ولدو فقال ليهو يابوي الفار ردة ليه ياود انا كديسة
قال ليه ياابوي انا قلت ليك اكلوا

قالوا في واحد ادروب شاحن ليهو عربية بتاعة (جداد)..وبعدين جاي من بورتسودان

للخرطوم..فقاموا ناس القبانة في اول محطة قالوا ليه :يا زول الجداد ده بتاكلو شنو سمين كده..ادروب حبة يقشر قال ليهم (جداد بياكل قمح) الجماعة قاموا كسروا ليك ادروب كسر شديد..وقالوا ليهو الناس ماقادرة تاكل انت تاكل الجداد قمح..

في المحطة التانية سالوه (ها الجداد سمين كده..بياكل شنو)..ادروب فكر كده.وقال ليهم عيش(جداد ياكل عيش)..برضو كسرو ليك ادروب كسر شديد..

في المحطة التالتة في مدني برضو سالوه(جداد ده بياكل شنو يا اردوب)...

ادروب عاين كده..وقال ليهم والله انا ماعارف..انا بصحي الصباح بدي كل جدادة حق الفطور جداد يتصرف براهو!!!

شافع من شفع الرباطاب جابو ليهم استاذ راسو مطاول شكل غريب جدا وقال ليهم الاستاذ اسالكم سوال المابجاوب بطردو من الحصة فرد الشافع اسعلني فقال الله كم واحد ولا اثنين فضحك الشافع ضحك شديد فقال ليه البضحك شنو فزاد الشافع في الضحك وقال ليهو لو كانو اثنين ماكانو اتشاورو في راسك دا

رباطابي قاعد في مطعم وكلما جاء زبون يطلب حاجة صاحب المطعم عندو حلة واحدة يفتحها ويغرف منها وتكرر المشهد عدة مرات ونفس الحلة عايز فول عايز كباب عايز عدس عايز كبدة وبرضو نفس الحلة اخونا الرباطابي مشي لصاحب المطعم وقال يااخونا حلتك دي فيها ادراج ولاشنو

رباطابي راكب القطر بتاع الشمالية من غير قصد وعشان مافي نور قام داس ليو رجل احد منالقاعدين وكان من جنوب السودان فرد عليه بزهج شديد انت مابشوف ولا شنو تطلع في كراع الناس احسه انت ماشي وين فرد عليه الرباطابي انا ماشي عند اهلي انت ماشى وين

قالوا كان في رباطابي مستني قطر الشماليه,قامت سألتو حجه برضها عايزنه نفس القطر لكنها طرشها,قالتالقطر ده قطر كريمه)رد عليها ايوه. تاني سألت لانو ما سمع(القطر ده قطر كريمه) رد عليها ايوه. تالت مرة سألتولقطر ده قطر كريمه) قام صرخ في وشها: (انت القطر ده الا يشلخوها ليك عشان تعرفيو قطر كريمه).

قالوا رباطابي نزل ضيف عند جماعة .. جابو ليه الفطور سليقه .. والغداء سليقة
والعشاء سليقه .. سأل صاحب البيت إنته شغال شنو .. قال ليه جزار .
الرباطابي قال ليه الليله ضابح ليك صهريج .

رباطابي في اثناء الطواف في الحج عفص ليهو مراة عفصة غير مقصودة فقالت ليهو شنو انت مجنون فرد ليهاايي عريان وبفلع في الحجار

رباطابي جاء الخرطوم لحضور زواج وكان متوقع في العشاء مالذ وطاب من الصواني الكبيرة زي مابيحصل في البلد المهم وقت العشاء عمك جابو ليهو صحن ورق وحاجة باردة وبعد ما اكل لمو منو صحانة الورق عمك قفلت معاو قال ليهم العرس ده زي امتحان الشهادة جابو الورق ولمو الورق

قالوا رباطاب قاعدين يحفروا في قبر في المقابر .. جاء واحد قال ليهم السلام عليكم
قالوا ليه عليكم السلام .. قال ليهم خير مالكم .. قالوا ليه عندنا واحد مات .. قال ليهم مات هنا ولا خبر .. قالوا ليه خبر .. قال ليهم سمح بتحفروا ليه ..
قالوا ليه دايرين ندفن التلغراف .

حمار اتعود يحك راسو بشباك فصل في مدرسة.. الاستاذ قال لي الطلبة: الحمار ده كل يوم بعمل كده عندو ود عم هنا ولا شنو؟رد عليهو تلميذ رباطابي: والله ما بجي إلا في حصتك يا أستاذ..!!

دكتور رباطابي شغال في الجنوب اول يوم ليهو في العيادة جابو ليهو واحد النمر اكل نص جسمه وقالو للدكتور شوف لينا حل للزول دا فرد ليهم عندكم حل واحد رجعو الزول دا للنمر يتمو بي الغداء

إتنين كانو بصلو الظهر جماعة إمام ومأموم وجاء واحد تالت وما عارف الإمام اليمين ولا الشمال فالصحيح هو أن يسحب المأموم ليرجع معاهو وراء ويبقى الإمام قدام ولكنه بدلاً من من ما يسحب الماموم سحب في الإمام يسحب يسحب يسحب والإمام واقف تُج وكان في رباطابي واقف بعيييييييييد ويشاهد في الموقف في النهاية صاح في الزول وقال ليهو
هوي الضلفة دي مقفولة جر التانية

في واحد رباطابي جنننننو سكر .. وعندو جار أنصار سنة. جارو مشى ليهو ينصحوا وشبكو ليك: الخمرة دي بتودر العقل .. الخمرة دي بتعمل ليك تليف في الكبد يعني بالعربي كدا الخمر دي يعني ( موت بطيييييء ) قام الرباطابي اتلفت عليهو وقال ليهو ( أنا زاتي ما مستعجل ) !!!!!

رباطابي بتاع لبن المهم عندو زبون محامي مرة زوجتو غالطت الرباطابي في حق يومين مدعية انو كان في مطرة والرباطابي مصر انو اداهم اللبن في اليوم البعدو فتدخل زوجها المحامي وقال ليهو انحنا ماممكن تغالطنا ابدا فرد ليهو اغالطك كيف وانت الغلاط فاتح لو مكتب

شافع رباطابي ببيع البيض في محطة القطر فنادي عليه واحد مشلخ تعال اديني ثلاثة بيضات ولمن اداهو البيض قال ليهو دا شنو بيض مسلوق فرد الشافع اي مسلوق انا ماقائلك داير تركض فيهواي تحضنه

رباطابي في عزومة زواج لاحظ انو في زول نائم نومة عميقة جدا بس في اللحظة الختو صينية الاكل عمك تترب صحي وابتداء يلقلق فعلق الرباطابي زولكم دا كان مختوت في الشاحن

شايقي عاوز يقرق علي رباطابي فقال ليهو ابوحمد دي شنو فرد ليهو ابوحمد دي راجل لي كريمة

رباطابي جاء ماشي في منطقة كلها ابل وصادف انها كلها راقدة ماعدا واحد فعلق قائلا الجمل دا الظاهر فايتاهو ركعة
رباطابي عندو اخوانو راقدين في المستشفي الاول موصلين له درب والثاني قاعد يرجف من شدة الالم، خالو ضرب ليه ، قال ليه اخوانك كيف ، قال ليو واحد شغال هزاز والتاني جاري الشحن ..

استاذ دنقلاوي بيدرس في الرباطاب سال واحد ياولد اعرب الجملة دي
جاءت محمد
فرد ليه شافع رباطابي
جاء فعل ماضي ناقص
التاء تاء الدناقلة
محمد فاعل

رباطابي مشى لصاحب دكان سمعو تقيل خالص ..فقا له : أديني معجون حلاقه وأمواس... فظل صاحب الدكان يستفهم والرباطابي يصيح إلى أن سمع أخيراً ... وأعطاه قلم ًرصاص وكراس ... أخذهم صاحبنا مضطراً حتى لا يدخل في دوامة أخرى معه وأعطاه ثمنها ... فسأله صاحب الدكان ... : أديك بالباقي شنو ؟ ... فقال له الرباطابي بدون تردد : أديني بيهو إملاء